Banerlər
Xəbərlər

 

MİLLİ YAYLAQ FESTİVALINDA “AZƏRXALÇA”NIN MƏHSULLARINA BÖYÜK MARAQ GÖSTƏRİLİB

Yaylaq və elat ənənələrinin yaşadılması və təbliği məqsədilə Azərbaycanda ilk dəfə olaraq Milli Yaylaq Festivalı keçirilib.

Türk Əməkdaşlıq və Koordinasiya Agentliyi (TİKA), “Cavadxan” Tarix və Mədəniyyət Fondu, Gədəbəy Rayon İcra Hakimiyyətinin təşkilatçılığı, Mədəniyyət və Kənd Təsərrüfatı nazirlikləri, Dövlət Turizm Agentliyi, Kiçik və Orta Biznesin İnkişafı Agentliyi, Azərbaycan Atçılıq Federasiyası və Dünya Etnoidman Konfederasiyasının rəsmi dəstəyi ilə keçirilib.

Gədəbəy rayonunun ərazisində yerləşən Düzyurd-Miskinli yaylağında təşkil olunan Milli Yaylaq Festivalına 16 ölkədən nümayəndələr, yerli və xarici turistlər qatılıb.

Milli Yaylaq Festivalında iştirak edənlər adət-ənənələrlə tanış olub, milli idman növlərinə tamaşa ediblər.

Miskinli yaylağında orijinal üslubda salınan “Yaylaq yurdu” adlı etno-qəsəbədə yaşayış yurdları (alaçıqlar) ilə yanaşı, cıdır meydanı, yaylaq (kənd təsərrüfatı) bazarı, sənətkarlıq guşəsi, “Dədə Qorqud” ocağı (tamaşaçılar üçün səhnə), yaylaq yatağı (ev heyvanları üçün yerlər), pəhləvan meydanı, “Aşıq Ələsgər” ocağı, yaylaq süfrəsi və digər tematik sahələr yaradılıb.

Festivalda “Azərxalça” Açıq Səhmdar Cəmiyyətinin filiallarında toxunan xalçalar da nümayiş etdirilib. “Azərxalça” üçün ayrılmış guşədə hana qurulub, Səhmdar Cəmiyyətin Şəmkir filialının toxucusu xalça toxuyub.

“Azərxalça” ASC-nin mətbuat xidmətindən bildirilib ki, Səhmdar Cəmiyyətin müxtəlif filiallarında istehsal edilən, ayrı-ayrı xalça qruplarına aid olan xalçalar festival iştirakçıları tərəfindən maraqla qarşılanıb. Burada, həmçinin xalçaçılıq tariximizdən bəhs edən, “Azərxalça”nın fəaliyyətini özündə əks etdirən müxtəlif dillərdə nəşr olunan kitablar, kataloqlar, broşürlər də sərgilənib.

“Azərxalça”nın pavilyonu ilə tanış olanlara qurumun əməkdaşları tərəfindən Azərbaycan xalçaçılıq tarixi, Səhmdar Cəmiyyətin fəaliyyəti, ölkəmizdə bu milli sənət növünə göstərilən qayğı, yaradılan şərait barədə ətraflı məlumat verilib.

BAKI. 30.07.2019. AzerTAc.


Saytda yeni
Valyuta məzənnəsi
ABŞ dolları
1.7000
Avro
1.8788
Rusiya rublu
0.0267
Hava proqnozu
+34°
 / +26°
Bakı
Qalereya
Layihə haqqında   |   Məktub yazmaq
© www.azerbaijan.az 2010