Banerlər
Xəbərlər

 

NAZİR NORBERT HOFER: AVSTRİYA AZƏRBAYCANDA HƏYATA KEÇİRİLƏN NƏQLİYYAT VƏ İKT LAYİHƏLƏRİNƏ XÜSUSİ MARAQ GÖSTƏRİR

Azərbaycanın nəqliyyat, rabitə və yüksək texnologiyalar naziri Ramin Quluzadə Vyanaya rəsmi səfəri çərçivəsində Avstriyanın nəqliyyat, innovasiya və texnologiyalar naziri Norbert Hofer ilə görüşüb.

Görüşdə müxtəlif sektorlar üzrə əməkdaşlığın mövcud vəziyyəti və perspektivlərinə dair səmərəli müzakirələr aparılıb.

Ramin Quluzadə ölkəmizin təşəbbüsü ilə son illərdə həyata keçirilən regional əhəmiyyətli infrastruktur layihələri, o cümlədən Şimal-Cənub və Şərq-Qərb nəqliyyat dəhlizlərinin səmərəliliyinin artırılması istiqamətində görülmüş işlər barədə geniş məlumat verib. Bununla yanaşı, İKT və rabitə sahəsində milli səviyyədə həyata keçirilən proqram və layihələr, o cümlədən Azərbaycanın təşəbbüsü ilə reallaşdırılan Trans-Avrasiya Super İnformasiya Magistralı layihəsinə toxunub. Nazir bu çərçivədə Avstriya şirkətlərini Azərbaycanın İKT və nəqliyyat sektorlarında daha fəal olmağa, öz məhsul və həllərini hər il Bakı şəhərində təşkil olunan “Bakutel” Beynəlxalq Telekommunikasiya Sərgisində nümayiş etdirməyə dəvət edib.

Norbert Hofer Avstriyanın Azərbaycanda həyata keçirilən nəqliyyat və İKT layihələrinə xüsusi maraq göstərdiyini söyləyib və bu xüsusda, iki ölkənin müvafiq qurumları və özəl sektor nümayəndələri arasında təmasların intensivləşdirilməsini təklif edib.

Tərəflər ikitərəfli əməkdaşlığın hüquqi bazasını təkmilləşdirmək məqsədilə iki nazirlik arasında yeni əhatəli Anlaşma Memorandumunun hazırlanaraq imzalanması üzrə razılıq əldə ediblər. Həmçinin ikitərəfli əməkdaşlığın tənzimlənməsi üçün İKT və nəqliyyat məsələləri üzrə vahid işçi qrup yaradılması qərara alınıb.

Ramin Quluzadə Azərbaycanın haqlı müraciətinə cavab olaraq, “Austria Telekom” şirkətinə məxsus Bolqarıstanın “M-Tel” mobil operatorunun Azərbaycanın işğal olunmuş ərazilərində qeyri-qanuni fəaliyyət göstərən “Karabakh Telecom”la rouminq sazişini ləğv etməsindən məmnunluğunu ifadə edib.

Görüş zamanı Ramin Quluzadə, həmçinin Bakı şəhərinin 2025-ci ildə “Ekspo” Ümumdünya Sərgisinə ev sahibliyi etməklə bağlı namizədliyi barədə məlumat verib və Avstriyanı namizədliyimizi dəstəkləməyə çağırıb.

BAKI. 02.03.2018. AzerTAc.


Saytda yeni
Valyuta məzənnəsi
ABŞ dolları
1.7000
Avro
2.0006
Rusiya rublu
0.0275
Hava proqnozu
+26°
 / +16°
Bakı
Qalereya
Layihə haqqında   |   Məktub yazmaq
© www.azerbaijan.az 2010