Banerlər
Xəbərlər

 

HEYDƏR ƏLİYEV MƏRKƏZİNİN PARKINDA “ŞAHMATÇI AİLƏM” TURNİRİ KEÇİRİLİB

Ötən həftəsonu Heydər Əliyev Mərkəzinin parkında “Şahmatçı ailəm” turniri keçirilib.

Yarışda 50 komanda, ümumilikdə 100 nəfər iştirak edib.

İştirakçılar əvvəlcədən qeydiyyatdan keçərək yarışa qoşulublar. Hər komanda 2 üzvdən ibarət olub: kapitan (14 yaşınadək gənc) və onun bir ailə üzvü. Ailə üzvü olaraq bacı, qardaş, ana, ata, nənə və ya baba yarışda iştirak edib.

Turnirdə ən gənc iştirakçının 6, ən yaşlı şahmatçının isə 75 yaşı olub.

Sürətli şahmat qaydalarına uyğun keçirilən turnir 5 mərhələdən ibarət olub. Komandalar qarşılaşarkən kapitan rəqib kapitanla, ailə üzvü isə rəqib komandanın ailə üzvü ilə mübarizə aparıb. Hər bir üzvün qazandığı xalların cəmi komandanın xalı kimi hesablanıb və ən çox xal toplamış komandalar turnirin qalibi elan olunub.

Birinci yeri Səbinə Rzalının (atası Süleyman Rzalı), 2-ci yeri Mirfamil Seyidlinin ( qardaşı Mirmövsüm Seyidli), 3-cü yeri İsmayıl Məhəmmədin (atası Fərman İsmayıl) komandaları qazanıb.

Tofiq Abdullayev (babası Mehmanağa Quliyev) və Rafael Bayramlının (atası Araz Bayramov) komandaları eyni xal qazandığından hər ikisi 4-cü yerə layiq görülüblər.

İlk 3 yeri tutan komandalar medal və sertifikatla, 4-cü yeri tutanlar isə sertifikatla təltif olunub.

Turnirə beynəlxalq dərəcəli hakim Ülkər Umudova və “Ağ At” şahmat klubunun müəllimləri nəzarət ediblər.

Tədbir şahmatın inkişafı, təbliği, uşaq və yeniyetmələrin, şahmatsevərlərin asudə vaxtının səmərəli təşkili məqsədilə keçirilib.

BAKI. 31.07.2017. AzerTAc.


Saytda yeni
Valyuta məzənnəsi
ABŞ dolları
1.7008
Avro
1.9972
Rusiya rublu
0.0284
Hava proqnozu
+31°
 / +23°
Bakı
Qalereya
Layihə haqqında   |   Məktub yazmaq
© www.azerbaijan.az 2010